Frantzian haurren pobreziari aurre egiteko proposamena

Zenbait ikuspegitatik aztertzen du haurren pobrezia Familiaren, Haurtzaroaren eta Adinaren Frantziako Goi Kontseiluaren txosten luze horrek. Besteak beste, fenomeno horren eragina gutxitzeko proposamen bat jasotzen du: prestazio selektibo bat ematea maila jakin batetik beherako diru-sarrerak dituzten familiei (horiei bakarrik), Frantziak lehendik ere baduen prestazio familiarren, gutxieneko diru-sarreren eta kenkari fiskalen sistema zabalaren osagarri. Hiru egoera hipotetiko proposatzen ditu azterketako simulazioak: seme-alabengatiko osagarriak handitzea fami-lia ugariei eta gurasobakarrei (revenu de solidarité active); seme-alaba bakoitzeko gehigarri bat ordaintzea -soldata osagarri gisa- lansari urriko langileei (prime d’activité), eta prestazio espezifiko bat sortzea euren kargura adingabeak dituzten eta maila jakin batetik beherako diru-sarrerak dauzkaten familientzat, ardurapean seme-alabak edukitzeagatik Espainian ordaintzen denaren antzekoa. Bi mila euro ingurukoa izan daiteke horren kostua; haurren pobreziaren tasa, berriz, % 5,2 eta % 13,6 bitarte jaits daiteke, hots, kasurik onenean 360.000 bat adingabe atera daitezke pobreziatik.