Bartzelonako metropoli-eremuko etxeko arreta-zerbitzua

Txosten horren helburua da Bartzelonako metropoli-eremuan udalaren etxeko arreta-zerbitzuaren hedapena aztertzea, eta, ildo horretan, estaldurari, intentsitateari eta kostuari buruzko datuak eskaintzen ditu. Metropoli-eremuan, oro har, 65 urtetik gorako biztanleen % 15ek eta 70 urtetik gorakoen % 50ek jasotzen dute etxeko zerbitzuren bat, eta, etxeko laguntza-zerbitzuaren kasu zehatzean, estaldura hori areagotu egin da azken urteetan. Mendekotasuna aitortuta daukaten pertsonek hilean 17,3 orduz jasotzen dute laguntza batez beste, eta etxeko laguntza-zerbitzu sozialaren onuradunek, berriz, 10,7 orduz. Denbora hori askoz laburragoa da mendekotasun-maila handiagoa duten pertsonek behar dutena baino. Azkenik, zerbitzuaren kostuari dagokionez, udalek gastuaren % 8 inguru estaltzen dute, 14 euro orduko batez beste. Ordainketa partekatuko sistema errentaren arabera modulatzen den arren, eta kontuan izanik diru-sarrera handiagoak dituzten pertsonek erakargarriagotzat har dezaketela eskaintza pribatua -askotan ezkutuko ekonomiaren esparruan-, etxeko laguntza-zerbitzu publikoak funtsean errenta txikiagoa duten pertsonei ematen die arreta.