Ongizate-estatuaren etorkizuna Europar Batasunean [eu]

Europar Batzordeak eskainiriko txosten honek, Europar Batasuneko gizarte-babesaren eta ongizate-estutuarengan zenbait gertaeraren eragina azaltzen ditu. Gainera, joera globalek ongizatearen-estatuan dituzten ondorioak ere aztertzen ditu.

[Reseña en euskera]

Europar Batzordeak arestian argitaratuko txosten honetan, uneko ongizate-estatuaren egoerari buruzko xehetasunak aztertzeaz gain, etorkizunean Europar Batasuneko herrialdeen gizarte-babesaren eta ongizate-estatuaren inguruko egoera landu eta sakontzen da.

Ikerketaren oinarrian, Europar Batasunean kohesio soziala eta ekonomikoa bermatu ahal izateko, gizarte-babesak eta ongizate-estatuak ezinbesteko tresnak diren azpimarratzea da. Gainera, COVID-19ak eragindako pandemiaren eta Ukraina eta Errusiaren arteko gatazken ondorioek epe luzera izango dituzten eraginak aztertzen ditu, etorkizunean sortu daitezkeen joerak nabarmenduz. Tartean egungo “megajoerak” ere, aurrekaririk gabeko ondorioak izango dituzte gizarte, ekonomia eta lan-merkatuetan. Horien adibide da, besteak beste, biztanleria zahartzea eta eskulana gutxitzea dakarten aldaketa demografikoak, lan-merkatuaren bilakaera konstanteak, digitalizazio zein teknologien aldaketak, edota klima-aldaketa eta trantsizio ekologikoaren ondorio sozialak. Horren harira, lanaren moldaera berriak eta lanaren indibidualizazioak, Europar Batasunaren herrialdeetako lan-merkatuen garapen etengabean, eraldaketa nabarmena sustatuko duten gakoak azaltzen dira.

Txostenaren ondorio giltzarrietako bat, COVID-19aren pandemiak, Europar Batasuneko gizarte-babes eta ongizate-estatuan eragin nabarmena izan duela da. Bereziki, osasun, zaintza eta gizarte-zerbitzuen eskaera handitzeaz gain, eremu horietako gastu publikoaren igoera eman dela ikusi daitekeelako. Hori gutxi balitz, zerbitzu eta baliabideak eskuratzeari erreparatuz gero, gizarte ahulenen eta pribilegiatuen arteko diferentzia areagotu egin dela nabarmendu da. Bestalde, Errusia eta Ukrainaren arteko gatazkek, herrialde batzuen gizarte-babes eta ongizate-estatuan izan dituen eraginak azaltzen dira. Bereziki, zigor ekonomikoek eta merkataritza-gatazkek eragin duten inpaktua negatiboa izan dela azpimarratu da, eta ondorioz, gizarte-babesa eta ongizate-estatua bermatzeko gaitasunean eragin zuzena izan du. Bestalde, egoera energetikoaren inguruan Europar Batasunean sortu diren eragin zuzenak ere aztertzen ditu. Tartean, energia-pobreziaren erronka gero eta handiagoa nabarmentzen da, bereziki, etxebizitza ahula eta diru-sarrera txikiak dituztenetan.

Azkenik, joera globalek ongizate-estatuan izan duten eragina aztertzen du dokumentuak. Ikerlariak, globalizazioaren, teknologia berrien eta karbono murritzeko ekonomiaranzko trantsizioaren eragina nabarmentzen ditu gehien bat. Ongizate iraunkorreko politikek finantzazio jasangarria eskatzen dute, hots, gizarte-babeserako finantzazio-iturri zabalagoen ezinbesteko beharra, eta baita belaunaldien arteko gizarte-kontratu egonkor eta bidezkoak ere. Horrenbestez, gizarte-babeseko politikak eta ongizate-egoera joera orokorretara egokitzearen premiazko beharra azpimarratzen du etorkizuneko politikek emandako zerbitzuaren diseinuan, kudeaketan eta kalitatean zentratzea garrantzizkoa dela adieraziz. Europar Batasunaren kohesio soziala eta ekonomikoa bermatu ahal izateko, beraz, berrikuntza eta aldaketa sustatzeaz gain, epe luzera jasangarritasuna bermatuko duten politikak funtsezko tresnak direla ondorioztatzen da.