Nola eragiten die haurrei etxerik gabe uzteak?

Espainian egiten diren etxegabetzeetatik askok adingabeak dituzten familiei eragiten diete, zenbait kalkuluk diotenez; beraz, aztertu behar da zer ondorio dakarzkieten kaleratze horiek adingabeen garapen familiarrari, sozialari eta eskolakoari. Enclave sarearen ekimenez, haurrei eta etxegabetzeei buruzko ikerketa-lerro bat jarri zuten martxan Hipotekek Kaltetutakoen Madrilgo Plataformak eta Qiteria kooperatibak, giza eskubideen ikuspegitik. Elkarrizketak eta taldekako lantegiak erabili dira txostena egiteko metodologia gisa, eta haien bidez jaso dira etxebizitzatik alde egin behar izan duten neska-mutikoen bizipenak, bai eta haien senideenak eta haurren eskubideak babesten lan egiten duten adituenak ere. Txostenak dioenez, ohartzen dira adingabeak etxegabetzeak eragiten duen hondamen ekonomikoaz, eta sufritu egiten dute berekin dakarren gizarte-bazterkeriagatik eta estigmagatik (gutxi aipatu ohi diren arazoak, biak ere).  Hona txostenaren zenbait gomendio: psikologikoki eta emozionalki egoerari aurre egiten laguntzeko tresnak sortzea -berdinen artean eta familietan-, eskolan sentsibilizazioa sustatzea, eta adingabeko horien familien gizarte-babesa sendotzea.